Etxebizitzaren krisiari aurre egiteko neurri gisa, Eusko Jaurlaritzak hutsik dauden eraikinak eskuratzen hasi da, eta 170 zuzkidura bizitoki sustatzea aurreikusten du Gipuzkoan eta Bizkaian. Orion, Elgoibarren eta Elorrion egingo dira etxebizitza horietako batzuk, eraikin industrialak eta publikoak birgaituz.
Orion, zehazki, Nueva Ceramica fabrika zaharra birgaitu eta bertan 40 bat etxebizitza eraikiko dira. Eibarko epaitegi zaharra eta AIBE industria eraikina ere birgaitzen ari dira zuzkidura bizitokiak sortzeko. Jaurlaritzak dagoeneko amaitutako proiektuak ere aipatu ditu, hala nola Azpeitiko Esklabetako komentuaren hegalekoa (48 bizitoki) eta Arrasateko Sindikatuen Etxea (12 bizitoki).
Helburua da lehendik dauden higiezinak aprobetxatzea, lurzoru berria erabili gabe eta hiri paisaia osatzen duten eraikinak berreskuratuz. Horrela, ondare baliodun egiturak eta elementuak zaintzea eta haien higatzea saihestea ahalbidetzen du, eraikinak ostatu eskuragarri bihurtzean ondarea berreskuratzen dela eta bizitegi aukerak sortzen direla adierazi du Pablo Garciak, Etxebizitza, Zoru eta Arkitektura zuzendariak.
Nueva Ceramica de Orio lantegia izan zen eraikinak, Aita Lertxundi kalean dagoenak, 1940an Ignacio Mendizabalek, Jose Ignacio Yereguik eta Luis Tolosak egindako proiektu batekin hartu zuen gaur egungo itxura. Obra hori Gipuzkoako industria arkitekturaren adibide esanguratsua da. Aurretik, 1899tik 1920ko hamarkadara, Alemaniako Schneider enpresaren lantegi bat izan zen bertan.
