Automobilismo zaleen aspaldiko nahia gauzatuko da datorren larunbatean, Ardatz Motorsport klubak Erniope Rallysprinta antolatuko baitu. Proba honek hamabost urteko etenaldia amaituko du, eta Azpeitia, Errezil eta Bidania-Goiatz arteko errepideetan jokatuko da, goizeko 10:00etan hasita.
“"Poz handia dugu, aurten pausoa ematera animatu garelako, eta gure nahia egi bihurtuko dugulako Azpeitiko, Errezilgo eta Bidania-Goiatzko udalei, Euskadiko Automobilismo Federazioari, babesleei, Errezilgo herritarrei eta lasterketa antolatzen lagunduko diguten hainbat boluntariori esker."
Lasterketak ikusmin handia sortu du eskualdean, eta aurkezpen ekitaldira jende ugari bildu zen. Guztira, 46 auto gidarik eta beste hainbeste kopilotuk eman dute izena. Antolatzaileek adierazi dutenez, nahiz eta parte-hartzaile gehiago espero zituzten, kopuruarekin gustura daude, eta nabarmendu dute gidari garrantzitsuek hartuko dutela parte.
Parte-hartzaileen erdiak eskualdekoak dira, eta horien artean hainbat izen ezagun daude. Esaterako, Aitzol Apalantza lasaotarrak Hyundai 120N Rally 2 autoarekin lehiatuko du, eta Iñaki Alberdi azpeitiarrak Porsche 997 Gt3 Cup batekin. Errezil herriko lau gidarik ere parte hartuko dute: Aitzol Apalantza, Gurutz Agirretxe, Iker Zinkunegi eta Amets Irulegi. Azken honek, 21 urteko gazteak, debuta egingo du Citroen Saxo batekin, eta lasterketa amaitzea du helburu nagusi.
Proba larunbatean, apirilak 25, goizeko 10:00etan hasiko da, Lapatxeko zabortegiaren aurrean, eta Bidania-Goiatzen amaituko da. 13,7 kilometroko ibilbidea lau txandatan egingo da: bi goranzka goizean eta bi beheraka arratsaldean. Errepidea goizeko 09:00etan itxiko da eta 18:30-19:00ak aldera irekitzea aurreikusten da. Antolatzaileek herritarren segurtasuna eta ingurunearen garbitasuna bermatzeko deia egin dute, eta boluntarioen laguntza eskertu dute, horiek gabe lasterketa ez litzatekeelako posible izango.
