Lau urtean behin egiten den Elkanoren lehorreratzea ikuskizuna ostiral arratsaldean izango da, 17:00etatik aurrera, Getarian. Aurreko urteetan bezala, jendetza espero da Getariako kaleetan, baita inguruko herrietako bizilagunen artean ere, moilako eta Alde Zaharreko kaleak betez.
Salbatore jaien barruan antolatutako ekitaldi honek eragin handia izango du Getariako trafikoan, baita eskualdekoan ere. Arduradunek jakinarazi dutenez, kostako errepidea, N-634 errepidea, itxi egingo dute Zumaia eta Zarautz artean, 15:00etatik 19:30era bitartean. Horren ondorioz, ezingo da Getariara autoz joan aipatu ordutegian.
Aipatutako denbora tartean, anezkako autobus zerbitzua egongo da 10-15 minutuan behin, Zumaia eta Getaria artean, eta Getaria eta Zarautz artean. Zumaiatik Getariara doazen autobusak porturaino iritsiko dira, eta Gaztetapen buelta emanda itzuliko dira Zumaiara. Zarautzetik datozenek, berriz, Iturritxikin emango dute buelta eta Zarautzera itzuliko dira.
Meagatik datozenentzat, Getariako bizilagunek bakarrik izango dute herrian sartzeko aukera. Horretarako, gidarien nortasun agiria egiaztatuko dutela adierazi dute.
