Zestoako Udala k irailaren 14an plazaratutako adierazpen instituzional batean gaitzetsi du festetako azken egunean izandako eraso larria, pertsona bati lepa-uztaia hautsi eta buruan zauriak eragin zizkioten. Erasoaren ondorioz, biktima Donostia Ospitalea n ingresatu zuten eta neurologia zerbitzuaren zaintzapean jarraitzen zuen adierazpena argitaratu zen unean.
Udalak irmoki gaitzetsi du gertatutakoa, eta halako jarrerak elkarbizitzaren aurkako erasotzat jo ditu, argudiatuz eztabaidarik sutsuenak ere ez duela justifikatzen pertsona baten aurkako indarkeriazko ekintzarik.
Festen balorazio orokorrari dagokionez, Udalak adierazi du ekitaldiak jendetsuak izan direla eta giro sanoa nagusitu dela, nahiz eta zikinkeria eta txikizio txiki batzuk egon diren. Aurreko urteetako antolaketa arazo batzuk saihestea lortu dela ere azpimarratu du.
Bereziki, gazte eguneko “Antton Etxera” herri bazkariaren eta kuadrillen eguneko paelladaren ondorengo jasotze lanak nabarmendu ditu, antolatzaileek eta herritarrek egindako lanari esker inoiz baino txukunagoa eta ordenatuagoa izan dela azpimarratuz.
Adierazpena amaitzeko, erasoa jasan duen pertsonari elkartasuna helarazi dio Udalak, eta hura artatu eta osasun zerbitzuei deitu zieten herritarrei eskerrak eman dizkie.
Adierazpen osoa Zestoako Udalaren webgunean irakurgai dago.
