EAJk azpimarratu du eztabaidaren funtsa borondate politikoan dagoela, eta ez proposamenen egingarritasunean. Adierazpen hauek EH Bilduk EAJri “gezurretan” eta “herritarrak engainatzen” aritzea leporatu ostean iritsi dira, HAPOaren inguruko eztabaidan.
Joan den astean, Zumaiako udalbatzarrak behin-behineko HAPOa onartu zuen, herriko hirigintzaren etorkizuna zehaztuko duena. Onarpen hori EH Bilduren aldeko botoekin eta oposizioaren kontrako botoekin gertatu zen. EAJk adierazi zuen plangintzak ez diola behar bezala erantzuten herriko etxebizitza krisiari, planaren indarraldia laburregia dela eta aurreikusten dituen etxebizitza berriak gutxiegi direla argudiatuz.
Koalizio abertzalearen arabera, EAJk proposatutako neurriak ez dira egingarriak, eta talde jeltzaleari interes alderdikoien mesedetan “herritarrak engainatzea” leporatu zion. EAJk, bere aldetik, ez die erreferentziarik egin EH Bilduk bere proposamenei egindako zuzenketei, baina bai Udal Gobernua zuzentzen duen koalizioak erabilitako tonuari.
“"HAPOak 20 urteetarako gehienez 680 etxebizitza eraikitzeko muga ipintzen duela, eta hori gezurra dela ziurtatu du EH Bilduk: “800 eraiki daitezkeela jasotzen du, eta desdoblatzeko aukera izanda 1.090eraino igo daiteke kopuru hori”. EAJko zinegotziak —herri borondatearen ordezkariak— ia maila pertsonalean deskalifikatzera iritsi dira. Gure helburu bakarra Zumaiarentzat eta zumaiarrentzat onena defendatzea denean, demokratikoki aukeratutako ordezkari publikoei 'gezurti' esatea ez da errespetu instituzionalaren adierazgarria, ezta herriak behar duen lankidetza giroarena ere."
Talde jeltzaleak defendatu du politikan erabakiak eta kudeaketa publikoak kritikatzea zilegi dela, eta gaitzetsi du ez dela “EH Bilduk horrelako estiloa erakusten duen lehen aldia”. EAJren arabera, “estilo horrek, sendotasuna baino gehiago, urduritasuna erakusten du”.
