Naziogintza Taldeak azken hilabeteetan antolatutako hitzaldi zikloa amaituko da astearte honetan, maiatzak 12. Kike Amonarriz soziolinguistak itxiko du zikloa, Tolosako bilakaera linguistiko arrakastatsua azalduz.
Hitzaldi honetan, 'Euskara bidegurutzean' zikloaren barruan, 'Erabilera %29tik %52ra. Tolosako esperientziaren gakoak' izeneko aurkezpena egingo du Amonarrizek. Saioa arratsaldeko 19:00etan hasiko da Basazabal jauregian, eta sarrera doakoa izango da.
Hau da Naziogintza Taldeak Azpeitian antolatu duen bigarren hitzaldi zikloa. Iaz 'Abertzaleak' izenburupean euskal abertzaletasunaren bost figura enblematiko ezagutzeko aukera izan zen. Oraingoan, 'Euskara bidegurutzean' izenburupean, lau hitzaldi eta mahai-inguru izan dira, gaurkoa azkena.
“"Euskarak eta euskal kontzientzia nazionalak elkarri eragiten diote. Euskal kontzientzia nazionala zabaltzen den heinean, zabalduko da baita ere euskararen erabilera, eta alderantziz."
Naziogintza Taldearen helburu nagusia euskal kontzientzia nazionala hedatzea eta indartzea da, euskara ardatz hartuta. Horregatik antolatu dute bigarren hitzaldi ziklo hau, euskararen gaur egungo egoera, erronkak, mehatxuak eta aukerak ezagutarazteko.
