Hitzaldi hau Urola Erdiko sei udalek –Azkoitia, Azpeitia, Beizama, Errezil, Zestoa eta Aizarnazabal–, Iraurgi Berritzenek eta Lapatx zabortegiko zerbitzu berriak kudeatzen dituen Laienek iazko urte amaieran abian jarritako kanpaina baten parte da. Kanpainaren helburua eskualdeko herritarrek energia ereduaz, subiranotasunaz eta mugikortasunaz hausnartzea da.
Hitzaldi ziklo hau apirilaren 14tik 28ra bitartean egingo da, eta saio bana eskainiko da Azkoitian, Azpeitian eta Zestoan. Azkoitikoa izango da lehena. Antolatzaileek Urola Erdiko herri guztietako biztanleak gonbidatu dituzte parte hartzera, Beizama, Aizarnazabal eta Errezil bezalako herri txikien errealitatea eta ekarpena ere kontuan hartu nahi baitituzte eskualde osorako ikuspegi bat lantzeko.
Azkoitiko mahai inguruan hiru adituk hartuko dute parte: Ander Gortazar, EHUko Hirigintza irakaslea eta RAZ bulegoaren sortzailea; Ibon Rosales, Lasarte-Oriako udal arkitektoa eta udal mugikortasun politiketan esperientzia duena; eta Diego Gomez, geografoa eta INTRAko kidea, mugikortasun-azterketetan aditua. Andoni Elduaien Gukako kazetariak moderatuko du saioa.
Hitzaldiak ikuspegi desberdinak ezagutzeko eta iritziak partekatzeko guneak izango dira, eta, era berean, ondoren herriz herri egingo diren lan saio parte hartzaileen abiapuntu izango dira.
Saio horietan, herritarrek aukera izango dute eskualdeko eta herrietako egoera aztertzeko, proposamenak lantzeko eta lehentasunak adosteko, mugikortasun eredu jasangarriago baten alde.
