Lagun Onak mendi bazkunak Santa Engrazi Eguna ospatuko du datorren igandean, apirilaren 19an, mendia, festa eta tradizioa uztartuz. Egun horretarako, gaztetxoei zuzendutako ibilaldi bat antolatu dute. Parte-hartzaileak Zestoara joango dira autobusez, eta handik hasiko dute ibilbidea, Agiro MKko kideekin batera.

Irteera Azpeitiko anbulatorio aurretik izango da, goizeko 9:00etan. Autobusean bertan ordaindu beharko da: 5 euro bazkideentzat eta 8 euro bazkide ez direnentzat. Izena emateko azken eguna apirilaren 16a, osteguna, izango da.

Bestalde, Lagun Onak mendi bazkunako kideek Ehunmilak birako hirugarren etapa egingo dute apirilaren 25ean. Oraingoan, Aralar izango da protagonista, Larraitz eta Lizarrusti arteko 16 kilometroko ibilbide batekin, 1.100 metroko desnibel positiboarekin. Irteera goizeko 7:00etan izango da, anbulatorio aurretik.

Etapa honetan parte hartzeko kuota 15 eurokoa da bazkideentzat eta 20 eurokoa bazkide ez direnentzat. Izena emateko azken eguna apirilaren 23a, osteguna, da. Interesdunek diru-sarrera egin beharko dute Rural Kutxako kontu korrontean (ES05 3008 0152 64 5416695822), beren izen-abizenekin, eta ordainagiria lagunonak.ibilaldiak@gmail.com helbidera bidali.

Azken asteotan, elkarteko mendizaleek Bisaurin mendia ere igo dute. Ostiralean Azpeititik atera eta Gabarditon lo egin ondoren, larunbatean gailurrera iristea lortu zuten, eguraldi onarekin eta kranpoi eta pioleten laguntzarekin. Igandean, ordea, euria zela eta, taldeak etxera itzultzea erabaki zuen gosariaren ondoren. Gabarditoko aterpeko lagunei eskerrak eman dizkiete emandako arreta bikainagatik.