Misioaren helburua da Euskadi eta Okzitaniaren arteko lankidetza indartzea, Europako gune aeronautiko eta espazial nagusietako batean euskal industria aeroespazialarentzat aukera berriak sortuz. Tolosa Europako industria aeroespazialaren etorkizunerako erreferentziazko gune bihurtu da.
“"Industria aeroespaziala kalitatezko lanpostuak sortzen dituen hazkunde handiko sektorea da, eta teknologikoki oso aurreratuak diren lanpostuak sortu nahi ditugu."
Euskal ordezkaritza hainbat bilera egiten ari da egunotan Airbus, Safran, Liebherr eta ATR bezalako enpresa liderrekin, Euskadiren eta Frantziako Okzitania eskualdearen arteko industria eta merkataritza harremanak sendotzeko. Helburua da lankidetza-aukera berriak identifikatzea, batez ere hornikuntza-katearen hazkunde beharrei erantzuteko.
Euskadik presentzia sendoa du eskualdean, 11 euskal enpresak 12 ezarpen dituztela bertan. Harreman hori sakontzea eta Tolosa euskal industriarentzat hurbileko merkatu estrategiko bihurtzea da asmoa. Gainera, enpresen, zentro teknologikoen eta talentu espezializatuaren arteko lankidetza sustatu nahi da.
Euskal sektore aeroespaziala Euskadi 2030 – Industria Planeko sektore estrategikoetako bat da. 2025ean, sektoreak 3.400 milioi eurotik gorako fakturazio bateratua lortu zuen, 2.900 milioi euro inguruko esportazioekin eta 6.500 pertsona inguruko enpleguarekin. Gainera, 213 milioi euroko inbertsioa egin zuen I+G arloan, Euskadiko intentsitate teknologiko eta hazkunde-gaitasun handia duen jardueretako bat dela berretsiz.
