Aurten, 'Maiatza Saltsan' egitasmoak izena aldatu du, eta 'Sortzaileak Saltsan' deituko da. Ekimen honek Zizurkilgo sortzaileen lana balioaniztu nahi du, eta herritarrei aukera eman kulturaz gozatzeko eta diziplina anitzeko tailerretan parte hartzeko.

Hainbat tailer antolatu dira maiatzean zehar. Batetik, haurrei zuzendutakoak izango dira, eskoletan egingo direnak. Bestetik, 16 urtetik gorako herritarrei begirakoak, herriko hainbat gunetan. Helduentzako tailerrak bi ordukoak izango dira eta doan eskainiko dira, baina aurrez izena eman beharko da.

Izen-ematea tailer bakoitza hasi baino bi egun lehenagora arte egin ahal izango da, gaurtik aurrera. Horretarako, bulegoa@zizurkil.eus helbidera idatzi edo 943 69 10 12 telefono zenbakira deitu beharko da (3. luzapena). Salbuespen bakarra maiatzaren 31ko jarduera izango da, horretarako ez baita aurrez izena eman beharko.

Udalak nabarmendu duenez, Zizurkilen diziplina askotako sortzaileak daude, eta ekimen honen bidez haien lana ezagutzeko eta kulturaz gozatzeko deia egin die herritarrei.

Helduentzako tailerren artean, ilustrazio tailer bat (maiatzak 7, Iriarte kultur etxean), idazketa tailer bat (maiatzak 13, Plazida Otañoko gela balioanitzean), gorputz espresio tailer bat (maiatzak 21, Atxulondo kultur etxean), moñoak eta alpargatak egiteko tailer bat (maiatzak 22, Joxe Arregi plazan), plaza dantzak (maiatzak 22, Joxe Arregi plazan) eta artile tindaketa tailer bat (maiatzak 28, Herriguneko Zimiterioan) daude. Gainera, maiatzaren 31n, San Vito Audiogida aurkeztuko da, Zizurkil beste ikuspegi batetik ezagutzeko.