Larraizko ermitatik (Abaltzisketa) Txindokiko gailurrera jokatu den Kilometro Bertikala haize bolada zakarrek baldintzatu dute. Nahiz eta 200 korrikalari baino gehiago zeuden izena emanda, 160 izan dira irteeran, eta horietatik bakarrak utzi du ibilbidea amaitu gabe.
Proba honetan, Maider Unanue (46:22) eta Oier Zubeldia (36:50) izan dira azkarrenak, eta horrela, Euskal Herriko Kilometro Bertikaleko txapeldun izendatu dira. Antolatzaileek 2.000 euroko saria eskaini zuten Juan Mari Garin zizurkildarrak 1993an ezarritako marka (33:34) hobetzen zuenarentzat, baina oraingoan ez da lortu.
“"Dena borobil atera da, eta eragozpen bakarra haizea izan da."
Aurtengo edizioak antolakuntza talde berria izan du, eta antolakuntzako kide batek adierazi duenez, “dena borobil” atera da, haizea izanik oztopo bakarra. Eskerrak eman dizkie boluntarioei eta korrikalariei erakutsitako jarreragatik, eta dagoeneko hurrengo urteko proba antolatzeko lanean ari direla jakinarazi du.
