Tolosako kaleak eta inguruko mendiak lasterkarien oihalez beteko dira asteburuan, T3T maratoiaren 11. edizioa eta T2T mendi lasterketaren 9. edizioa ospatuko baitira. Antolakuntza taldeko kide den Iñaki Insaustik adierazi duenez, ekaina iritsi da eta probak aurrera doaz, aurreko urteetan bezala. Guztira, 350 parte hartzaile izango dira T3T proban eta 475 T2Tn.

T2T proban izen-emate prozesuan izandako arazoak direla eta, antolatzaileek zozketa egin zuten plataformaren kolapsoa zela medio. Emakumezkoei lehentasuna eman zitzaien, eta horrela, %25 inguruko parte hartzea lortu zen, aurreko urteetan bezala. Itxaron zerrenda bat ere zabaldu zen, eta azkenean, bajen ondorioz, guztiek izan dute parte hartzeko aukera.

Maratoian, berriz, ez zen zozketarik izan eta parte hartze maila %10-15ekoa izango da emakumezkoetan. Insaustik azaldu duenez, nahiz eta aurten T3Tn Euskal Herriko Taldekako Txapelketa jokoan egon, emakumezkoen parte hartzea ez da laurdenera iristen. "Gurean beti gertatu izan da T2T proban emakumezkoen parte hartzearen portzentajea handiagoa izatea", adierazi du.

Aurten, proben noranzkoa aldatu egin da, ilusioa pizteko helburuarekin. T3T maratoiak Erroizpe/Larte, Uzturre eta Hernio pasatuko ditu, eta T2Tk, berriz, Erroizpe/Larte eta Uzturre. Insaustiren esanetan, "jendearengan sentsazio ezberdinak pizten ditu beste noranzkoan korrika egiteak".

Trianguloa plaza izango da gune estrategikoa, lasterketaren eta festaren erdigunea. Aurten, T3Tko parte hartzaileek Alde Zaharrera sartuko dira pixka bat iritsi aurretik, Zerkausi kaleko iritsiera biziagoa egiteko. Lasterketa 150 metro luzatu da horretarako.

Bi probak desnibelaren aldetik "gogorrak" dira, baina zailtasun tekniko aldetik "maila ertainekoak". Gizonezkoetan, Robert Pkemboiren marka (3.56.32) hobetzea zaila ikusten du Insaustik T3Tn, baina emakumezkoetan posible dela uste du. T2Tn ere, marka hobetzeko aukera ikusten du emakumezkoetan.

Aurreko postuetan egon daitezkeen lasterkarien artean, gizonezkoetan Beñat Ibañez, Ander Iñarra, Iñaki Olano, Anartz Artola, Hassan Ait Chaou, Endika De las Heras, Iraitz Legorburu, Ander Amonarriz, Sergio Oliveri eta Jon Durana aipatu ditu T3Trako. Emakumezkoetan, berriz, Sarah Ugarte, Itxaro Zabaleta, Amagoia Iribar, Sara Gutierrez, Oihane Unzalu, Irati Ortiz de Anda, Itziar Oteiza, Maialen Artiach, Larraitz Aragon eta Ainhoa Intxausti. T2Tn, emakumezkoetan Ainhoa Garikano, June Agirrezabala, Irati Larrañaga, Leire Elola, Eider Zubeldia eta Enara Agote; eta gizonezkoetan Amets Aranberri, Asier Artola, Ibai Makazaga, Iker Ezeiza, Josu Urrestarazu, Jokin Tolosa eta Aitor Regillaga.

Berritasun gisa, aurten autobusa jarri da Elduainera joateko, trafiko arazoak ekiditeko. Tolosako Udalarekin hitzarmen baten bidez, doako zerbitzua eskainiko da 09:00etatik 12:00etara bitartean.

Antolakuntza taldea hamabi pertsonak osatzen dute, eta gazteen parte hartzea bultzatu da. Boluntarioen lana ezinbestekoa dela azpimarratu du Insaustik, eta oraindik boluntario batzuk behar dituztela gaineratu du.

Datuak:
T3T MARATOIA: Hasiera 08:45ean. Ibilbidea: Tolosa, Erroizpe/Larte, Uzturre, Hernio eta Tolosa. Ezaugarriak: 42,8 km eta 2.878 m desnibel positiboa. Markak: Gizonezkoetan Robert Pkempoi (3.56.32), emakumezkoetan Mayi Mujika (4.54.14).
T2T MENDI LASTERKETA: Hasiera 09:30ean. Ibilbidea: Tolosa, Erroizpe/Larte, Uzturre eta Tolosa. Ezaugarriak: 24,4 km eta 1.600 m desnibel positiboa. Markak: Gizonezkoetan Oier Ariznabarreta (2.06.34), emakumezkoetan Maialen Muñoz (2.38.17).