Anoetako plazan larunbat gauean gertatutako eraso sexistak gaitzesteko elkarretaratzea egin dute gaur. Udalak eta Erasoen Aurkako batzordeak deituta, hainbat herritarrek bat egin dute ekitaldiarekin, eta gaitzespen "tinkoa" azaldu dute gertatutakoaren aurrean.
Batzordeak "babes osoa" eskaini die erasoak jasan dituzten emakumeei eta haien ingurukoei. Horrez gain, emakumeen aurkako indarkeriari aurre egiteko protokolo instituzionala aktibatu dutela jakinarazi dute, erasoa jasan dutenei eta haien gertukoei arreta egokia emateko helburuarekin.
Ez ditugu inola ere onartzen emakumeen eskubideak urratzen dituzten erasoak, eta jaiak errespetuz gozatu nahi ditugu. Anoeta horretarako leku seguru eta erosoa izatea nahi dugu.
Behar dutenei laguntza eskaintzeko, Adi eta So mahaiarekin edo udaleko gizarte zerbitzuekin harremanetan jartzeko deia luzatu dute. Anoetako jaiak bihar hasiko dira ofizialki, eta 24 orduz martxan egongo diren telefono zenbakiak ere jakinarazi dituzte: 688 601 679 (batzordea), 943 65 12 00 (udala), 112 (larrialdiak) eta 900 84 01 11 (Satevi).
