Liburutegiak apirilaren 23an ireki zituen ateak, eta hamarkada bat bete du herriko kultur gune gisa. Udalak eskerrak eman nahi izan dizkie proiektu honetan parte hartu duten guztiei, “herritik herriarentzat sortutako espazio sortzaile, kritiko eta berritzailea posible egin duzuen guztiei”.

Ospakizun programa gaur bertan hasiko da, euskarazko literatura tertuliarekin, 17:30ean. Saio honetan, Itziar Ugarte Irizarren Gu gabe ere liburua aztertuko da, Iratxe Retolazaren gidaritzapean. Ondoren, 18:30ean, Maddi Ane Txoperena idazlearen Zaldi bat liburuaren aurkezpena egingo da liburutegian.

Ostegunean, 18:00etatik aurrera, 'Kontalari2' taldeak ipuin kontaketa eskainiko du familia guztiarentzat. Ostiralean, berriz, haur irakurketa klubaren txanda izango da, Ainhoa Sukia liburuzainak gidatuta, Joemak eta Polasak liburuari buruz hitz egiteko.

Liburutegiko ekitaldiez gain, herrian beste hainbat jarduera ere izango dira. Ostiralean, Elizpe jubilatuen elkarteak 'Pausoka, adinak ez du inporta' ekimena egingo du. Parte-hartzaileak Joxe Arregi plazan elkartuko dira 10:00etan, eta Asteasura doan bidean ibiliko dira. 12:00etan berriro elkartuko dira plazan hamaiketakoa egiteko. Arratsaldean, 19:30ean, Plazaetxeberrin, Eskola Txikien Festako kantuaren eta bideokliparen aurkezpena egingo da.

Larunbat honetan, 19:00etan, Iriarte Kultur Etxean, Akelarre marearen kontra dokumentala proiektatuko da. Film luze honek musika talde baten historia kontatzen du, eta taldeko musikariek ere parte hartuko dute saioan.