Gune berri honek gazteei zuzendutako zerbitzuak eskainiko ditu, hala nola enplegua bilatzeko tresnak, ekintzailetza laguntzak, alokairu publiko zein pribaturako izapideak eta laguntzak. Udalaren Gazteria atalaren bidez, aholkularitza, informazioa eta prestakuntza jasoko dute gazteek hirian emantzipatzeko. Gainera, tailerrak eta ikastaroak antolatuko dituzte gazteen bizi proiektuak garatzen laguntzeko.

Gazteria zinegotzi Iñigo Garcíak adierazi duenez, helburua da Donostian bizi, ikasi edo lan egiten duten gazteek bizitza autonomoa eta garapen pertsonala sustatzeko beharrezko tresnak eskuratzea.

Aurrez aurreko zerbitzuaz gain, programa osagarriak ere izango ditu bulegoak, hala nola gazteen ideiak eta proiektuak bultzatzeko Martx-Up ekimena, eta sormena, enplegagarritasuna eta bizi-modu independentea sustatzeko laborategiak eta parte hartzeko guneak. Garcíaren esanetan, bulegoa emantzipazio politika publikoak diseinatu eta sistematizatzeko gune bat ere bada, beste udalerri batzuetara transferitzeko moduko ikaskuntzak lortzeko.

Bulegoaren ibilbideari hasiera emateko, maiatzean hainbat hitzaldi antolatu dira Kontadoresen bertan. Hilaren 19an, Gazteak eta etxebizitza: Aukerak eta baliabideak ezagutu izeneko hitzaldia izango da, 18:00etatik 19:30era, 18 eta 35 urte bitarteko gazteei zuzenduta. Bertan, etxebizitza alokatzeko eta erosteko aukerak eta gazteen emantzipazioa bultzatzeko laguntzak azalduko dira.

Astebete geroago, hilaren 26an, Jaurlaritzako Gazteria eta Emantzipazio zuzendari Adrian Lopez Sarachagak eta Finantzen Euskal Institutuko Paula Pereda Perezek Jaurlaritzak 8 eta 39 urte bitarteko gazteei lehen etxebizitza erosteko emango dituen abalen berri emango dute, ordutegi berean. Bi saioak doakoak dira, baina izena ematea beharrezkoa da.

Bulegoaren arreta ordutegia honakoa da: astearte eta ostegunetan, 11:30etik 13:30era eta 17:30etik 20:30era; eta asteazken eta ostiraletan, 17:30etik 20:30era.