Irteera Tolosatik abiatuko da, eta Uzturre eta Erroizpe tontorretatik igaro ondoren, korrikalariak berriz ere Tolosara itzuliko dira. Ibilbideak 24 kilometro inguruko luzera eta 1.600 metro inguruko desnibel positiboa ditu.

Nahiz eta ibilbidea exijentea izan, taldearen erritmo eta dinamikara egokituko dira parte-hartzaileak, ingurunea ezagutzeko eta taldekideen konpainiaz gozatzeko aukera eskainiz. Irteera luzea izango denez, bakoitzak bere ura eta jatekoa eramatea gomendatzen da. Era berean, antolatzaileek gomendatzen dute aldatzeko arropa eta, bereziki, oinetako egokiak eramatea.

Hasiera punturaino, hau da, Tolosaraino, kotxez joango dira. Parte-hartzaileak goizeko 07:15ean elkartuko dira skate parkean, GKN eta futbol zelaiaren parean dagoen aparkalekuan. Kotxeak antolatzeko, izena ematen dutenekin WhatsApp talde bat sortuko da.

Izen-ematea Inda Mendi M.B.-ren webgunearen bidez egin beharko da. Zalantzak argitzeko edo informazio gehiago jasotzeko, interesdunek 666 377 442 telefono zenbakira WhatsApp bidez idatz dezakete.