Helene Alberdi zumaiarrak ez zuen hutsik egin faboritoen artean zegoen arren, eta Distantzia Ertaineko Espainiako Triatloi Txapelketa nagusitu zen atzo Iruñean. 3:52:23 denboran osatu zuen proba.
Maria Vilas galiziarrak ezustekoa eman zuen, hasieratik aurrean jarrita bai igeriketan eta baita bizikletako zatian ere. Alberdi hirugarren postuan iritsi zen korrikako zatira, baina erritmo bizia mantenduz, bigarren itzulian aurrea hartu zion Vilasi eta konfiantzaz iritsi zen helmugara.
Alberdiren atzetik, bi minutu eta erdira iritsi zen Vilas (3:55:03), bigarren postuan, eta podiuma Marina Muñoz segoviarrak osatu zuen, hirugarren sailkatuta (3:58:29).
Guztira, 2.000 triatleta inguru lehiatu ziren Nafarroako errepideetan eta Iruñeko Alde Zaharrean. Lasterketak Agoizko urtegian hasi zen bi kilometroko igeriketa saioarekin, jarraian 80 kilometroko bizikleta ibilbidea eta 18 kilometroko korrika egin zituzten, Gaztelu plazan amaituz.
