Ikaztegietako Guraso Elkarteko ordezkariek kezka agertu dute herriko haurren artean euskararen erabilera gutxitzen ari delako, batez ere adin txikienetan. Egoera horri aurre egiteko, Eusfera dinamika bultzatzeko asmoa dute, hizkuntzaren presentzia indartzeko tresna gisa.
“"Beti eman izan diegu garrantzia euskararen aldeko proiektuei; beraz, berehala pentsatu genuen aurrera egitea. Gainera, guztiok dugu presente herri askotan dagoen arazo bera: gaztelania tokia egiten ari da euskararen ondoan, batez ere, haurren artean."
Elkarteko kideek adierazi dutenez, Eusfera dinamikak erronka anitz proposatzen ditu haurrekin etxean egiteko. Informazioa familiei helarazten ari dira, parte hartzera animatuz. Hasiera batean, ez dute ekintza berezirik antolatuko, ezta Euspaziorik sortuko ere, beren errealitatea desberdina dela argudiatuz.
Gurasoek nabarmendu dute gaur egungo haur euskaldunen ingurunea gero eta erdaldunagoa dela. Hainbat faktore aipatu dituzte, hala nola haur erdaldunen presentzia, pantailen eragina eta sare sozialak. Joera hori bereziki nabaria da haur gazteenen artean, non haur erdaldun bakar batek ere inguruko haur euskaldunak gaztelaniaz hitz egitera bultza ditzakeen.
“"Euskaldunok joera handia dugu multzo batean euskaraz hitz egiten ez dakien norbait dagoenean gaztelaniaz hitz egiteko. Hori ez gertatzea gure esku dago, eta kontzientziatu behar dugu euskaraz egin behar dugula."
Ikaztegietan, 5. eta 6. mailako haurrek ia erabat euskaraz hitz egiten duten arren, adinean behera egin ahala gaztelania gehiago entzuten da. Horren arrazoietako bat da ikastetxeko haur gazteenetako batzuen gurasoek gaztelania dutela ama-hizkuntza. Guraso euskaldunek ere, batzuetan, gaztelaniaz hitz egiten diete haur horiei, eta horrek eragin negatiboa du haur talde osoaren hizkuntza-ohituretan.
Gurasoek azpimarratu dute garrantzitsua dela guraso guztiek beren ekarpena egitea eta eredu izatea. Eusfera bezalako ekimenek ez dute esfortzu handia suposatu behar, eta euskararen bultzada izateaz gain, haurrekin aisialdiaz gozatzeko aitzakia izan behar dute.
