Herriko udalak jakinarazi duenez, udan zehar herrigunea eta hondartza lotuko dituen "txu-txu" tren zerbitzua berreskuratuko du. Zerbitzu hau datorren astelehenean, ekainaren 24an, hasiko da eta abuztuaren 31ra arte egongo da martxan.
Trenak egunero egingo ditu ibilbideak, goizez 11:30etik 14:00etara eta arratsaldez 16:00etatik 20:30era. Ibilbidea Ikastola pareko plazatik hasiko da, hondartzara joan eta handik itzuliko da, tartean Bikamiotan geldialdi bat eginda.
Uda osorako bonuak 10 euroan eskuratu ahal izango dira Turismo Bulegoan ekainaren 29tik aurrera. Data horretatik aurrera, bonuen prezioa 20 eurora igoko da.
Bidaia solteak ere erosi ahal izango dira, euro batean, trenean bertan, Turismo Bulegoan eta kanpinean. Txartel honek bidaia bakarrerako balio du, hau da, hondartzatik herrira edo herritik hondartzara joateko.
Horrez gain, hamabost joaneko bidaia biltzen dituzten bonuak ere salgai jarriko dira, 10 euroko prezioan.
Zerbitzuaren barruan, 3 urtetik beherako haurrek doan bidaiatu ahalko dute gurasoen edo tutoreen ardurapean.
