AuzoEkin proiektuaren lehen fasea arrakastaz burutu da Tolosan, iazko martxotik aurten arte. Ekimen honetan, hiru eremu nagusik hartu dute parte: Bidebieta-Izaskun-Iparragirre, landa-eremuko auzoak eta San Esteban auzoa. Udalak diagnostiko integralak egin ditu eremu bakoitzean, auzotarren parte-hartze aktiboarekin, bisiten, inkesten eta dinamika-saioen bidez proposamenak bilduz.
Jasotako erantzunetatik eta proposamenetatik abiatuta, auzotarrek bost urterako plangintza estrategikoa onartu dute. Plan horretan, 2026 rako lehenetsitako lanak zehaztu dira. Eremu bakoitzak 60.000 euroko aurrekontua izango du hobekuntzak gauzatzeko, eta diru hori udal-aurrekontuaren inbertsioen atalean dago jasota. Gainera, udalak beste lan batzuk ere bere gain hartu ditu, beste bide batzuetatik kudeatzeko.
“"Udal gobernuaren izenean, eskerrak eman nahi dizkiet prozesu osoan zehar parte hartu duten ia 1.000 tolosarrei, izandako inplikazioagatik eta egindako lanagatik."
Proiektuaren lehen edizio honetan, 993 bizilagunek parte hartu dute, hamaika lan-saioetan. Parte-hartzea parekatua izan da genero ikuspegitik, 496 emakume eta 497 gizon. Inkesten bidez 562 pertsonak eman dute iritzia, eta proiektuak batez beste 7,6ko asebetetze puntuazioa lortu du. Udalak prozesu osoaren informazioa argitaratu du Erabaki.tolosa.eus webgunean, non dokumentu guztiak kontsultatu daitezkeen.
Prozesuak auzo-elkarteen ekimena ere indartu du. Bidebieta-Izaskun-Iparragirre eremuan, adibidez, auzo-elkarte bateratu bat sortzeko prozesua abiatu da. Landa-eremuetan, berriz, lehendik zeuden elkarteak saretzeko saioak egin dira, kezka eta behar komunak hobeto bideratzeko. Udal-teknikariek laguntza eskaini diete auzotarrei komunitate-sorkuntza helburu horretan.
Udalak 2026 an proiektua eremu gehiagotara zabaltzeko asmoa du, Amarotz-San Blas-Usabal eta Berazubi-Iurre-Iurramendi eremuetan eta Arramele auzoan antzeko lanak egiteko.
