Azpiegitura berriak ur zikinen hustuketa eta edateko ura hartzeko gunea eskaintzen ditu, baita ibilgailuak 24 orduz elektrizitatez hornitzeko lau entxufe ere. Zerbitzu horiek erabiltzeak kostu ekonomiko bat izango du: 5 euro uraren kasuan eta 6 euro argindarraren kasuan. Gainera, autokarabanen neurrietara egokitutako lau plaza margotu dituzte eremuan.
Proiektua Europar Batasunaren Next GenerationEU funtsekin finantzatu da, Berreskuratze, Eraldaketa eta Erresilientzia Planaren barruan. Baliarraingo enpresa batek egin ditu egokitzapen lanak, turismo arduratsua eta kalitatezkoa eskaintzeko helburuarekin.
Udalak gaueko aparkaldia arautzeko ordenantza bat prestatzen ari da, 22:00etatik 06:00etara bitarteko egonaldiei 5 euroko tasa ezartzeko. Araudi hori irailean onartzea aurreikusten dute, eta horren bidez, aparkalekuan mahaiak, aulkiak eta toldoak erabiltzeko aukera emango zaie bisitariei.
