Eskuzkoan, Adunak Bergararen aurka jokatuko du etxean, joanekoan 2-1 galdu arren final historiko baterako aukerak mantenduz. Tolosak, berriz, Andoainen aurka jokatuko du gomazko paletan, Beotibarren 2-1 irabazita finalerako txartela eskuratzeko aukerekin.
Adunan, 500 bizilagun dituen herrian, ilusio handia dago finalera iristeko aukerarekin. Ehun bat herritar joan ziren joaneko partidara Bergarara pilotariak animatzera, eta igandean Adunako pilotalekua beteko dela espero da. "Guretzat finalera iristea izugarrizkoa izango litzateke", adierazi du Migel Anjel Zestau taldeko arduradunak. Kadete mailan 12-22 irabazi zuten, jubeniletan 22-13 galdu eta nagusietan 22-17 galdu zuten.
Zestauk %50ean ikusten du bueltako aukera: "Gaitasuna dugu kanporaketari buelta emateko, baina beraiek ere aurrera egiteko posizioan daude". Hala ere, "gure frontoian jokatuko dugula eta herritarren animoak izango ditugula" nabarmendu du. Lau tantoko desabantaila dute, beraz, bi partida irabazi eta bost tanto gehiago egin behar dituzte.
Gomazko paletan, Tolosak bere bigarren finalera iristeko aukera du, 2019an jokatu zuen lehenengoa galdu ondoren. Andoainen aurkako joanekoan, Beotibarren 7-20 galdu, binaka 20-12 irabazi eta 7ko koadroaren barruan 20-2 irabazi zuen, 13 tantoko abantaila lortuz.
Larunbatean 13:00etan hasiko da itzulerako jardunaldia Andoaingo Arrate pilotalekuan. "Beotibarren lortutako emaitzak abantaila ematen digu. Andoainen partida bat irabazita, eta beste biak galduta ere, alde polita dugu tantoetan", adierazi du Odei Arregi pilotari tolosarrak.
