Bilbo ko BAT Dorrean gaur ospatu den ETEKIN finantza-topaketak, "Euro digitala eta wallet europarra: erronkak eta aukerak" izenburupean, ordainketa eta identitate digitalaren etorkizuneko aukerak eta erronkak aztertu ditu. Bertan parte hartu dute Xabier Arrieta eta Óscar Guadilla, Eusko Jaurlaritzako EJIE ko kideak, eta Alaitz Zabala, Deustuko Unibertsitateko irakaslea.
Jardunaldiak nabarmendu duenez, ordainketa eta identifikatze digitalak gero eta presentzia handiagoa dute eguneroko bizitzan. Euro digitalaren eta wallet digital europarraren garapenak aukera berriak sortzen ditu, baina baita pribatutasunari, segurtasunari, konfiantzari eta arrakala digitalari lotutako galderak ere.
Xabier Arrieta k, EJIE ko ordezkariak, NIK esperientzian oinarrituta, azaldu du tresna hauen erabilgarritasuna eguneroko bizitzan. Txartel sanitarioa edo polikiroldegiko sarbidea mugikorrean izateaz gain, identitate digitala zerbitzuekin lotzeak administrazioarekiko harremanak sinplifikatu ditzake. "Botikak hartzea, polikiroldegiko tornutik pasatzea, zaborrontzia irekitzea... Hori martxan dago eta gizarteak egunero erabiltzen du", adierazi du. Gainera, identitate digitala mugikorrarekin konektatzeak autoak alokatu edo unibertsitateko titulu digitalarekin lan eskaintzetan izena emateko aukera emango luke.
Oskar Guadillak ikuspegi teknologikoa, segurtasuna eta bateragarritasuna landu ditu. "Jendeak ikusi ahal izango du zein datu eta norekin partekatu dituen. Gainera, partekatutakoa ezabatzeko aukera izango du. Ezer ez da automatikoa izango, erabiltzaileak bere datuak onartu beharko ditu", azaldu du. NIK en erabiltzen diren "verifiable credentials" bezalako teknologiak prest daudela gaineratu du, eta Europako erronka nagusietako bat herrialde eta administrazioen arteko estandar eta konfiantza marko komunak garatzea izango dela.
Alaitz Zabala k, berriz, eraldaketa honen dimentsio soziala eta akademikoa azpimarratu du. Bere iritziz, "ez gara dokumentu eta ordainketa baliabideen digitalizazio soil baten aurrean, baizik eta gure identitatea eta erakunde eta enpresekin ditugun harremanak ulertzeko moduan izandako aldaketa baten aurrean". Horregatik, pribatutasuna eta datuen gaineko kontrola funtsezkoak izango direla defendatu du, baina baita ere tresna digital hauek erabiltzeko zailtasunak dituzten pertsonak baztertu ez daitezen neurriak hartzea.
Parte hartzaileek bat etorri dira konfiantza, pribatutasuna eta segurtasuna funtsezkoak direla teknologia hauen hedapenerako. Aldi berean, digitalizazioak arrakala digitala sakontzeko arriskua dakarrela eta zerbitzu digitalak ez liratekeela identifikazio modu bakarra izan behar azpimarratu dute.
Mesa-inguruko formatuan egindako tertulia honen helburua gaia hainbat ikuspegitatik sustatzea izan da, eta Joseba Olagarai kazetariak zuzendu du. Amaitzeko, bazkari txiki bat eskaini da, parte hartzaileen artean iritziak trukatzeko eta sarea sendotzeko aukera emanez.
