Aurreko asteburuan hasi zen ospakizuna, Tras las huellas de Darwin y Pizarro a la ciudad sagrada de los incas lanaren aurkezpenarekin. Aste honetan, programak aurrera jarraituko du, eta asteartean, Xandra Bilbao idazleak bere El resurgir de las sorgiñak eleberria aurkeztuko du arratsaldeko 19:00etan, Udaletxeko Manu Yanke aretoan.

Bilbao idazle barakaldarrak euskal mitologiaren bihotzean murgiltzen da, Maria eta Aiza pertsonaien bidez, sorginen figuraren bitartez antzinako sinesmenen bilakaera aztertuz. Eleberriak denboraren poderioz bizirauteko aldatu behar izan ziren sinesmen horien egokitzapena erakusten du.

Ostegunean, areto berean, Garikoitz Goikoetxea ren Esnatu ala hil liburuaren txanda izango da. Despierta o muere. El presente y el futuro del euskera, a la luz de un diagnóstico izenburupean, lan hau Iñaki Iurrebaso soziolinguistak eta Garikoitz Goikoetxea euskara teknikariak argitaratu dute. Liburua argia eta zehatza da, eta euskaldun orok uler dezan idatzita dago.

Programari amaiera emateko, ostiralean, Belén Fernández idazlea izango da bertan, ¿Dónde está mi gato? liburuaz hitz egiteko. Haurrentzako literatura lan honek Nera izeneko neskatila baten istorioa kontatzen du, bere katu Flis desagertu ondoren aurkitzen dituen arrastoak jarraituz. Fernández idazle mirandarrak, fantasiazko eleberrietan eskarmentua izan arren, haur literaturaren munduan sartzea erabaki zuen lan honekin.