Jose Luis Orbegozo zinemagile eta produktore kolonbiarra duela zortzi urte inguru iritsi zen Azpeitiko Altzaga baserrira, bere aitonaren arbasoen arrastoei segika. Interneten Azpeitian Orbegozotarren bilera baten berri izan ondoren, autoan abiatu zen bertara, eta bertan bizi zen Jose Orbegozo ezagutu zuen, bere familiaren jatorriaz gehiago jakiteko helburuarekin.

Bere aitonak, Jose Orbegozo izenekoak, elizen eraikuntzan lan egin zuen Kolonbian, eta haren arbasoak euskaldunak zirela zioten kondairek. Jakin-min handiz, zinemagileak bere familiaren historiaren zati hau argitu nahi du, dokumental baten bidez.

27 urte daramatza New Yorken bizi, eta han telebista lanetan dihardu, zinemagile gazteen lana sustatzen. Euskal Herrira egindako azken bisitan, bertan ezagututako Orbegozotarren istorioekin dokumental proiektu bat hastea erabaki zuen, bere emaztearen animoz.

Sortu nahi duen filmak, "Aqui vive Jose Orbegozo? Jose Orbegozo hemen bizi al da? Zenbat bizimodu izan ditzake izen bakar batek?", Euskal Herria, Kolonbia eta New York arteko migrazioa eta memoria aztertuko ditu. Izan ere, Altzaga baserrian mendeetan bizi diren Orbegozotarren segida eta Kolonbiara migratu zuen familiaren historia uztartuko ditu.

Egunotan Euskal Herrian da proiektuaren baliabideak lortzeko, ekoizleekin eta erakunde publikoekin bilerak eginez. Dokumentala koprodukzio bat izatea du helburu. Era berean, Altzagako Jose eta Oihana Orbegozo aita-alabei eta Maria Luisa Orbegozori elkarrizketak grabatzen ari da, baita Altzagako orbegozotarrak liburuaren egilearekin ere.

Kolonbiako Orbegozotarrak ere izango dira protagonistak, hala nola Clara Ines eta Juanita Orbegozo, zinemagilearen arreba eta alaba. Orbegozo bera ere euskarazko klaseak jasotzen ari da, bere proiektuan hizkuntza hori ere txertatzeko asmoz.