Aurten Sagardoetxeak bere 20. urteurrena ospatuko du, sagardoaren kulturaren zabalkundean, ondarearen zaintzan eta sagardogintzari lotutako ezagutzaren transmisioan lanean jarraituz. Urteurrena ospatzeko, irailaren 12an ate irekien egun berezia antolatu da, jarduera ugari eskainiz.
Sortu zenetik bi hamarkada igaro direnean, Sagardoetxeak sagardoa edari bat baino gehiago dela ulertarazi du: kultura, ondare bizi, paisaia, gastronomia eta herri baten bizimodua biltzen dituen elementua da. Sagastiak, baserriak eta dolareak ez ezik, belaunaldiz belaunaldi igorritako ohiturak, hiztegia, musika eta ospakizunak ere sagardoaren ingurukoak dira.
Azken 20 urteotan, erakundeak sagardoaren ondarea hurbildu die herritarrei eta bisitariei, kultura hori ezagutzeko, bizitzeko eta partekatzeko esperientziak eskainiz. Urteurrena ospatzeko modurik egokiena, beraz, ibilbideari erreparatu eta sagardoaren kultura etorkizunera begira bizirik mantentzea da.
“"20 urte hauek ospatzeko modurik onena da gure ateak herritar guztiei irekitzea eta sagardoaren kulturaz gozatzeko aukera ematea."
Horren harira, irailaren 12an ospakizun-eguna izango da Sagardoetxean. Gainera, udazken honetan zehar antolatuko den Udazken Zaporez programak sagardoaren kulturarekin lotutako hainbat jarduera eta proposamen bilduko ditu.
“"Sagardoaren kultura ez dela iraganeko zerbait, baizik bizirik dagoen usadio eta kultura bat."
Horren adierazle dira, Xabier Urdangarin Astigarragako alkateak nabarmendu duenez, urriaren 24an eta 31n egingo diren Dolareak proiektuaren barruko bisita gidatuak. "Orain dela urtebete hasi ginen Erbetegi-Etxeberri dolarea berreskuratzeko lanak egiten Lapurdiko, Nafarroako eta Donostiako Lanbide Heziketako ikasleekin. Aurten, Europako Ondarearen Jardunaldien barruan bisita gidatuak egingo dira ondare hori herritarrei ezagutzera emateko", adierazi du alkateak.
