Ziortza-Bolibarko Udalak mugarri bat ezarri nahi du herriaren antolakuntzan, eta horretarako, 'Ziortza-Bolibar denONA' izeneko parte-hartze prozesua abiarazi du. Ekimen honen helburu nagusia espazio publikoen, hala nola plazen, parkeen eta kaleen, plangintza kolektiboa egitea da, herria topaketarako eta zaintzarako gune irisgarriago, seguruago eta atseginago bihurtzeko.
Proiektuak hirigintza hutsetik harago joan nahi du, arreta berezia jarriz mugikortasun iraunkorrean, zahartze aktiboan eta herritarren osasun zein ongizatean. Udaletik nabarmendu dutenez, prozesu honen arrakasta ez dago adituen esku, herritarren eguneroko esperientzian baizik. Horregatik, herrian bizi diren pertsona guztien begirada eta bizipenak jaso nahi dituzte, prozesua ahalik eta aberatsena izan dadin.
Parte hartzeko bideak dagoeneko zabalik daude. Apirilaren 15etik aurrera, herritarrek galdetegi bat bete dezakete, bide digitaletik zein etxeetako buzoietan banatutako paperezko bertsioaren bidez.
“"Prozesu honen arrakasta ez dago adituen esku, herritarren eguneroko esperientzian baizik. Horregatik, herrian bizi diren pertsona guztien begirada eta bizipenak jaso nahi ditugu."
Dena den, ekimenaren hitzordu nagusia datorren apirilaren 24an izango da. Egun horretan, saio ireki bat egingo da udaletxean, 18:00etatik 20:30era, 12 urtetik gorako bizilagun guztiei zuzenduta. Saioa formakuntza labur batekin hasiko da eta, ondoren, elkarrizketa-mahaietan antolatuko dira taldekako lanketak egiteko. Dinamika honen bidez, Ziortza-Bolibarko Udalak komunitatearen beharrei hobeto erantzungo dien herri eredua diseinatu nahi du, herritarrak beraiek izan daitezen etorkizuneko espazioen arkitekto nagusiak.
