Amoroto, Aulesti, Mendexa, Gizamuruaga eta Munitibar udalerriek osatzen duten Lea Ibarrako Mankomunitateak milioi bat euro bideratu du eskualdeko erakargarri natural nagusietako bat, Lea ibaiaren pasealekua, zaharberritzeko. Inbertsioa Next Generation funtsen eta Berreskuratze, Eraldaketa eta Erresilientzia Planaren (PRTR) kargura egin da.
Ibilbide historiko honek 23 kilometro inguru hartzen ditu, Oiz mendian, Munitibarren, jaiotzen denetik Lekeition itsasoratzen den arte. Helburua da kostaldean pilatzen den turismoa deszentralizatzea, barnealdeko eskualdeek ere onura jaso dezaten.
“"Garapen orekatu baten aldeko apustua da, naturaren, ondarearen eta komunitatearen arteko lotura indartzen duena."
Seinaleztapen eta informazio panel guztiak zaharberritzeaz gain, pasabideak berritu dira, zailtasun gutxiko ibilbide honetan mendizaleen segurtasuna bermatzeko. Proiektu honek ibilbidearen izena aldatzea ere ekarri du, orain Lea Naturbidea deitzen baita, eta Lekeitioko turismo bulegoraino luzatu da.
Sustatzaileek azpiegitura digital berri bat jarri dute martxan, etapei, interesgunei eta udalerrietako eskaintzari buruzko datu praktikoak eskaintzeko. Horrez gain, sare sozialetan profil aktiboak sortu dira. Munitibarren, ibilbidearen hasieran, komun publikoak eta aisialdirako guneak ere egokitu dira.
