BI-711 errepideko zirkulazioa, Lutxana eta Rontegi zubiaren azpiko biribilgunea lotzen dituena, eten egin da larunbatean, goizeko 7:30ean, eta igandean, gaueko 20:00ak arte luzatuko da. Neurri hau itsasadarraren gaineko bulebar handiaren bigarren faseko lanen ondorio da.
Moztura honen arrazoia operazio tekniko konplexu bat gauzatzea da, bide-ardatz honen eraldaketan aurrera egiteko ezinbestekoa. Lanek 46 metroko luzera eta 85 tonako pisua duten aurrefabrikatutako bi habe deskargatu eta kokatu behar dituzte, Asua ibaiaren gaineko zubiaren sekzioa handitzeko. Zabaltze honek oinezkoentzako eta txirrindularientzako espazio jarraitu eta seguru berri bat gehitzea ahalbidetuko du, itsasadarraren antzinako errepidean zeharreko ibilbide ez-motorizatuen jarraipena emanez.
Zubiaren aldi baterako itxierak ohiko konexioetan eragina izango du Deusto, Lutxana, Erandio eta Txorierriko korridorearen (BI-30) artean.
Afekzioak minimizatzeko, Foru Aldundiak ibilbide alternatiboak erabiltzea gomendatzen du: Deusto – Lutxana artean, Enekuri errepidea (BI-604); eta Erandio rako, Unibertsitaterako sarbidea (BI-747) eta Lutxana-Asua errepidea (BI-735).
Asua ibaiaren gaineko zubian egiten ari diren obrak Itsasadarraren Bulebarra proiektuaren parte dira. Proiektu honek Getxo eta Bilbo arteko oinezko eta txirrindulari ibilbideak lotuko ditu BI-711 errepidean zehar, eta Ezkerreko Ertzarekin ere lotuko da Erandio eta Barakaldo artean eraikitzen ari den pasabide berriaren bidez. Etorkizuneko bulebarrak itsasadarretik gertu dagoen oinezko pasealekua, bi norabideko bidegorria eta fatxaden ondoan erregularizatutako espaloiak izango ditu, ibilgailuen trafikoa abiadura murriztuan mantenduz.
