Helburua udalarenak diren eta gaur egun funtzionamendurako beharrezkoak ez diren aktiboak erabiltzea da, baita inguruko aparkaleku-aukerak hobetzea ere. Salgai jarriko diren partzelek lotura dute inguruan egingo diren aldaketekin, etorkizuneko institutu bat eraikitzeko lanek eremu horretako aparkaleku kopurua murriztuko baitute.

Enkantean aterako diren 25 partzela 10 eta 18 metro koadro artekoak dira, eta beste biak, berriz, 30 metro koadrokoak eta trastelekuarekin. Udal-zerbitzuek egindako tasazioaren arabera, trasteleku duten partzelen irteera-prezioa 34.700 euro ingurukoa izango da, eta gainerakoak, tamainaren arabera, 16.668 eta 18.709 euro artean kokatuko dira.

Eskaintzak baloratzeko, proposamen ekonomikoak izango du pisu nagusia (95 puntu), eta beste 5 puntu ordainketa aurreratua egiteagatik lor daitezke. Berdinketarik egonez gero, lehentasuna izango dute Ikeabarri plazatik gertu garajerik ez duten eraikinetako bizilagunek, eta ondoren, inguruko garajea duten etxebizitzen jabeek. Azkenik, zozketa egingo da puntuazio bera dutenen artean.

Eskaintza telematikoak www.contratacion.euskadi.eus webgunearen bidez aurkeztu beharko dira. Izapideak egiteko zailtasunak dituztenek KONECTA zerbitzua erabili ahal izango dute, Errekalde plazan eta Langilerian.

Interesdunek partzelak bertatik bertara ikusteko aukera izango dute ekainaren 4an, osteguna, bi txandatan: 12:00etan eta 18:00etan. Bisitak anbulategian hasiko dira.