Turismoaren sektorean erreferentziazko hitzordu honek Espainiako Estatuko zein nazioarteko turismoguneen eskaintza zabala bilduko du. Bertan izango dira Aragoi, Kantabria, Galizia, Andaluzia, Errioxa, Euskadi, Gaztela eta Leon, Madrilgo Erkidegoa, Eivissa, Menorca, Ceuta, Melilla eta Kanariar Uharteak, baita Costa Brava eta Gironako Pirinioak ere. Nazioarteko helmugen artean, Lisboa, Alentejo, Algarve eta Portugalgo erdialdea nabarmenduko dira.
Azokaren eskaintza bi ardatz nagusiren inguruan egituratuko da: Experimenta eta Saborea. Experimenta guneak turismo esperientzia aktiboari lotutako jarduerak eskainiko ditu, abentura, natura eta sentsazio berriak protagonista izango diren espazio batean. Bertan simulagailuak, tailerrak eta turismo aktiboari lotutako proposamenak aurkitu ahal izango dira.
Saborea guneak, berriz, gastronomia izango du ardatz, eta hainbat tokitako turismo gastronomikoaren aurkezpenekin eta esperientziekin gozatzeko aukera eskainiko du. Gainera, bisitariek zonalde ezberdinetako produktu adierazgarriak dastatzeko eta erosteko aukera izango dute.
“"Expovacaciones eskaintza eta eskariaren arteko topagunea da, eta proposamen pertsonalizatuak eta aholkularitza profesionala eskainita, bidaiariei erabakiak hartzeko prozesua errazten die."
Familientzako proposamenak ere ikusi ahal izango dira azokan, txikientzako jarduerekin batera. Era berean, sektoreko profesionalei zuzendutako edukia ere indartuko dute, turismo adimendunaren gobernantzari buruzko jardunaldi bat egingo baitute, Basquetourrek antolatuta. Azpimarratzekoa da Expovacaciones 2026k Etikoa ziurtagiria izango duela, jasangarritasunarekin, gizarteratzearekin eta ingurunearekiko errespetuarekin duen konpromisoa indartuz.
