Galdakaoko Udalak jakinarazi duenez, Urreta kiroldegiaren handitze eta eraberritze lanak amaierara iristen ari dira. Erakundearen aurreikuspenen arabera, instalazio berriak eta modernizatuak udazkenean egongo dira herritarren eskura. Epeei eusteko, uztailaren eta abuztuaren hilabeteetan lanek aurrera egiteko bultzada berezia emango zaie.
Aipatutako bi hilabeteetan, uztailaren 1etik abuztuaren 31ra, kiroldegia erabat itxita egongo da publikoarentzat. Neurri hau erabiltzaile gutxiago egoten den garaian hartu da, kluben denboraldiak amaitu eta oporraldia dela eta.
Hala ere, Udalak herritarrek kirol instalazioak erabil ditzaten neurri alternatiboak jarri ditu martxan. Elexalde kiroldegian jarduera indartuko da, eta uztailaren bigarren hamabostaldian, astelehenetik ostiralera, 09:00etatik 22:00etara zabalik egongo da. Horrez gain, Zuhatzu ko teniseko eta padel pistak irekita mantenduko dira uztailaren hilabete osoan, astelehenetik ostiralera, 17:00etatik 22:00etara.
Gainera, Urreta kiroldegiko arreta zerbitzua uztailaren lehen hamabostaldian ere martxan egongo da. Bulegoak 08:00etatik 15:30era irekiko dituzte abonuen alta berriak, informazio eskaerak eta bestelako izapide administratiboak kudeatzeko.
Neurri hauekin, Udalak kirol zerbitzuen etengabeko eskaintza bermatu nahi du obrak irauten duten bitartean, eta aldi berean, berritu berri den Urreta kiroldegiaren irekiera prestatzen ari da.
