Galdakaoko jaiak prestatzen ari dira, eta aurten ere Santakurtz jaietako egitaraua aurkeztu dute. Aurkezpenean izan ziren jaietako pregoilari aukeratu duten Iskander, txupinera Maria, kartelaren egilea Ane eta Jai Batzordeko kide Izaskun. Hauekin batera, jaietako hainbat xehetasun ere azaldu dituzte.
Pilota zaletuentzat ere izango da zerbait berezia. Izan ere, Euskal Selekzioak Pilota Jaialdia jokatuko du Galdakaoko jaietan, Munduko Txapelketarako prestaketa gisa. Irailaren 12an izango da Kurtzeko frontoian, eta bertan arituko dira Gaizka Carregal galdakoztarra eta Ekhi Irribarria aramarra, baita Azketa-Bernaola eta Lizeaga-Elorz bikoteak ere.
Bestalde, Galdakaoko Udalaren hurrengo erronka nagusietako bat Maximo Moreno parkea berritzea da. Iñigo Arriandiaga alkateak adierazi duenez, parkea herritarren topagune bihurtzea dute helburu, hiri altzariak berrituz, haurrentzako espazioak jarriz eta gune atseginagoa sortuz. Txomin Egileor kalea lasaitu ostean, bankuak, berdeguneak eta espaloiak berrituko dituzte, familia eta umeek disfrutatuko duten zonalde berria sortzeko.
Gainera, Galdakaoko Ahalduntze Eskolek 11 ikastaro antolatuko dituzte urritik maiatzera bitartean, Torrezabal Kultur Etxean eta Aperribaiko Eperlandan. Ikastaroak feminismoari, komunikazioari, autodefentsari, osasunari eta trebetasun digitalari buruzkoak izango dira. Izena emateko epea irailaren 2tik 16ra egongo da zabalik.
Santakurtzetako Bertso Jaialdia ere izango da irailaren 13an, Kurtzeko plazan. Bertan arituko dira Nerea Ibarzabal, Unai Iturriaga, Alaia Martin eta Julio Soto, Arkaitz Estiballes galdakoztarra gai-jartzaile lanetan dela.
Azkenik, Urreta kiroldegiko igerilekuak irailaren 1ean zabalduko dituzte berriro, udan itxita egon ostean. Jarduera fisiko desberdinetarako aretoak ere irekiko dituzte, nahiz eta kardio eta fitness gune berria urrian prest egotea aurreikusi duten.
