Txapelketa Sopelan hasi zen ostiralean, eta hainbat modalitate hartuko ditu barne: larruzko paleta, pala motza, esku pilota banaka (gizonezkoak frontoi osoan eta emakumezkoak lau eta erdian), esku pilota binaka eta zesta punta banaka 36 metroko frontoian (gizonezkoak eta emakumezkoak).

Lehiaketak 29 funtzio izango ditu eta Deba, Bakio, Ordizia, Barakaldo, Olaberria, Gatika, Beasain, Gernika, Ispaster, Zeanuri, Elorrio, Lemoa, Elburgo, Urretxu, Idiazabal, Galdakao, Abadiño, Segura, Arrasate, Basauri, Lazkao eta Zumarraga udalerriak ere zeharkatuko ditu. Finalak ekainaren 6an, larunbatean, eta ekainaren 7an, igandean, jokatuko dira.

Txapelketaren helburu nagusiak bi dira: batetik, hautatzaileei pilotariak lehiaketa erreal batean behatzeko eta baloratzeko tresna lehiakor bat eskaintzea; eta, bestetik, Euskal Pilota Selekzioa herritarrei hurbiltzea. Binakako partidetan, pilotari bakoitzak partida bakoitzean kide desberdin batekin jokatuko du, teknikariek izango dituzten erreferentziak indartuz. Irabazleek ez dute Munduko Txapelketarako txartela ziurtatuko, baina aukera handiak izango dituzte.

Hautatzaileei dagokienez, Xalbador Lizardi eta Iñaki Peluaga dira erreminta saileko arduradunak. Esku pilota emakumezkoen sailean Jon Alberdi dago buru, eta gizonezkoen sailean, berriz, Iraitz Olaetxea. Zesta puntan, Diego Beaskoetxea arduratuko da gizonezkoen taldeaz, eta emakumezkoen taldearekin jarraituko du. 36 metroko modalitatean, Euskal Federazioaren helburua epe ertainera puntista gazteak espezializatzea da.