EHUko LCTG taldeko, LAB sindikatuko eta BC3 zentroko ikertzaileek egindako lanak gaur egungo energia-ereduari buruzko eztabaida sustatzea du helburu. Ikerlanak frogatu du badirela aukerak autosufizientzia neto bat lortzeko, instalazio berriztagarri eta nagusiki publikoak ezarrita. "Gaur egungo egoera energetiko larriari irtenbide bat emateko eztabaida sustatzea du helburu ikerlanak", azaldu du Ortzi Akizu EHUko LCTG ikerketa-taldeko kideak.
Ikerketak dioenez, Euskal Herria Europan erregai fosilen dependentzia handienetakoa duen eskualdea da, kontsumitzen den energiaren %79 erregai fosiletatik datorrena. Gainera, hornitzaile nagusia AEB da. Horren aurrean, ikertzaileek kontsumoan oinarritutako ikuspegi batetik aztertu dute lurraldean autosufizientzia netoa lortzeko trantsizio energetikoaren eredua.
Datuak aztertuta, 2050erako energia-kontsumoa %51 murriztu daitekeela ikusi dute, sektorez sektoreko neurriak hartuz, hala nola energia-galeretan %80, garraioan %61, industrian %30 eta etxebizitzetako kontsumo termikoan %50. Horrela, Euskal Herriko energia-aztarna 128 TWh izatetik 63 TWh izatera murriztuko litzateke.
Kontsumo murriztu hori hornitzeko, energia berriztagarriaren tokiko sorkuntza %386 handitu beharko litzateke, 37 GW-eko potentzia instalatuz, batez ere teilatuetan eta lursail ez-emankorretan instalazio eoliko zein fotovoltaikoak ezartzeko. Eguzki-panelak teilatu guztietan ezarri beharko lirateke, eta Euskal Herriko azaleraren %2,1 erabili instalazio eolikoak eta fotovoltaikoak ezartzeko.
Trantsizio hori nagusiki era publikoan gauzatu litekeela diote ikertzaileek, aurrekontu nazionalaren %2,6 bideratuz 2050era arte, instalazio berrien %65 jabetza publikokoak izan daitezen. Ikerketak aztertzen du, halaber, lurraldeak helburu horiek lortzeko duen gaitasuna, eta nabarmentzen du trantsizioa ez dela justua izango publikoa eta berriztagarria ez bada.
“"LAB sindikatuak beharrezkoa ikusi zuen kontsumo ez jasangarriaren atzean dagoen eredu energetikoa aldatzeko proposamen berri bat lantzea, eta EHUk eta BC3k bat egin dute lehen ahalegin honetan. Orain, ikerketa hau lehen pausoa izanik, gizartean trantsizio energetikoa sustatzeko elkarrizketak sortzeko garaia da, bai enpresaz enpresa, bai erakunde publikoetan zein norbanakoengan."
