Barakaldoko Cruces Ospitale Unibertsitarioak ostomiarekin bizi diren pertsonen errealitatea gizarteari hurbiltzeko eta haien beharrak ezagutarazteko helburu duen ‘Ikusezina. Ostomia ikusgarri egitea Espainian’ erakusketa hartu du. Erakusketa ospitaleko sarrera nagusian egongo da ikusgai, eskailera helikoidalaren kristaldegian.
Espainiako Pertsona Ostomizatuen Elkarteen Federazioak (FAPOE) eta Estomaterapiako Erizain Espezialisten Espainiako Elkarteak (SEDE) bultzatutako kanpaina honen baitan, Euskadin gutxi gorabehera 3.200 pertsona bizi dira ostomiarekin. Patologia desberdinengatik izan daiteke beharrezkoa, hala nola koloneko minbizia, maskuriko minbizia, hesteetako hanturazko gaixotasuna, ginekologikoak edo endometriosiak.
Azken bost urteetan, Cruces Ospitale Unibertsitarioan batez beste 130 pertsona berri inguru erregistratu dira urtero ostomia digestiboa dutenak. Ostomiarekin bizitzeak egokitzapen prozesu bat eskatzen du, kirurgiaren haratago doa eta autonomia, gorputz irudia, ongizate emozionala nahiz bizitza sozial eta lanekoa ukitu ditzake.
Egokitzapen horretan, estomaterapiako profesionalen laguntza funtsezkoa da norberaren zaintza sustatzeko, konplikazioak prebenitzeko eta egokitzapena errazteko. Horren harira, Ospitaleko Estomaterapia Unitateak hainbat tailer antolatu ditu.
Jarduerak irailaren 30ean hasi ziren egokitzapen psikologikoari, inpaktu emozionalari, autoirudiari eta harremanei buruzko saio batekin. Urriaren 5ean, profesionalentzako larruazaleko zaintzei, babesari eta prebentzioari buruzko tailerra izan zen. Azkenik, urriaren 7an, estoma ezarri ondorengo elikadurari buruzko saioa izango da, paziente, senide eta zaintzaileei zuzenduta. Jarduera guztiak Salón Arriaga-n izango dira, 11:00etatik 12:30era.
Gainera, Cruceseko Estomaterapia Unitateak giza-praktika onen ziurtagiri internazionala du (HU-CI/AENOR), pertsona ostomizatuen eta haien familien behar fisiko, emozional eta sozialak kontuan hartzen dituen arreta eredu integral eta pertsonalizatu bat aitortuz.
