BilbaoArte zentroak ateak zabalduko dizkie herritarrei apirilaren 14tik 16ra, Urazurrutia 32 kaleko instalazioak bisitatzeko aukera eskainiz. Jardunaldi hauetan, egoiliar artisten lan-prozesuak, teknikak eta garatzen ari diren proiektuak ezagutu ahal izango dira, 2025/26ko Produkzio Laguntzei esker.

Zehazki, M.P. Benito, Manu Blázquez, Fátima Conesa, Blanca Castro Ponce, Juana García Pozuelo, Auritz Iñurrieta, Fermín Moreno, Antoine Nessi, Gareth Phillips, Laurita Siles, Amaya Suberviola eta Fernando Villena artisten sorkuntza-lanak ikusgai egongo dira.

Apirilaren 14an, asteartea, eta 15ean, asteazkena, BilbaoArte publiko orokorrari eta espezializatuari irekiko zaio, 17:00etatik 20:00etara, artisten presentziarekin. Gainera, apirilaren 14an, asteazkena, 18:00etan, 2026/27ko produkzio-laguntzen deialdiari buruzko informazio-saioa egingo da, eta izena emateko epea maiatzaren 10era arte egongo da zabalik.

Apirilaren 15ean, osteguna, 18:00etan, bisita gidatua eta ibilbidea eskainiko da tailerretan (eskultura, grafikoa, irudi digitala, medialab, filmaketa eta argazkilaritza, laborategi analogikoa, audiolab), artisten eta erabiltzaileen eskura dauden baliabide teknikoak ezagutzeko. Apirilaren 15ean eta 16an, goizez, bisita profesionalak egingo dira, BilbaoArteren gonbidapenarekin edo bilbaoarte@bilbao.eus helbide elektronikoaren bidez eskatuta.

1998ko azaroan ateak ireki zituenetik, Bilboko Bilbao La Vieja auzoko Urazurrutia kaleko udal eskola zaharretan, BilbaoArte erreferentziazko arte-produkzio zentro gisa finkatu da, Euskadi mailan ez ezik, nazioartean ere. Bilboko Udala, Bizkaiko Foru Aldundia eta BBK Fundazioaren laguntzarekin, talentu-harrobi bihurtu da, artista berrien prestakuntzan inbertituz eta artea motor kultural eta ekonomiko gisa sustatuz.