Bilboko Udalak LGBTIQ+ pertsonen eskubideak ikusgai egiteko, babesteko eta sustatzeko sentsibilizazio-kanpaina bat antolatu du datorren igandean, ekainaren 28an, LGBTIQ+ Harrotasunaren Nazioarteko Eguna ospatzeko. Ekimen honekin, Udalak berdintasunarekiko, aniztasunarekiko eta giza eskubideekiko konpromisoa berresten du, diskriminaziorik eta gorroto-diskurtso gabeko gizarte inklusibo baten alde eginez.
Itziar Urtasun Berdintasun eta Jaietako zinegotziak adierazi duenez, “pertsona guztiek askatasunez eta beldurrik gabe bizi duten Bilbo bat nahi dugu, haien orientazio sexualagatik edo genero-identitateagatik epaituak izan gabe”. Udalak etengabe lan egiten du LGBTIQ+ kolektiboaren benetako berdintasuna bermatuko duten politika publikoak bultzatzeko.
Kanpaina hau 2025-2030 aldirako Sexu eta Genero Aniztasunaren I. Udal Planaren barruan kokatzen da. Plan estrategiko honek LGBTIQ+ kolektiboaren eskubideak bermatzera eta haien ikusgarritasuna sustatzera bideratutako politika publikoak gidatzen ditu, diskriminazioa prebenitzeko eta hiri justuago, pluralago eta inklusiboago bat eraikitzeko.
“Bagara eta bagaude harro. Con orgullo, somos y estamos” lelopean, kanpainak Bilbo hiria aniztasuna aitortu, hartu eta ospatzen duen gune gisa aurkezten du. Sormenak hiriko izena irudikatzen du LGBTIQ+ errealitate desberdinak sinbolizatzen dituzten koloreetatik abiatuta.
Kanpaina hainbat euskarri fisikotan egongo da ikusgai, hala nola hiri-altzarietan, udal egoitzetako pantaila digitaletan eta udalaren webgunean eta sare sozialetan. Gainera, Bilboko Udalak hainbat eraikin eta gune publiko argiztatuko ditu ortzadarraren koloreekin ekainaren 24tik 28ra bitartean, Bilbao Bizkaia Harro ekitaldiarekin bat eginez.
Ekainaren 28ko gauean, udaletxeko fatxada nagusia ortzadarraren koloreetako argiz jantziko da LGBTIQ+ Harrotasunaren Nazioarteko Eguna ospatzeko. Gainera, ekainaren 25etik 28ra bitartean, Bilbao Bizkaia Harro plataformak antolatutako egitarau zabala izango da, musikak, kolorez eta harrotasunez betea.
Halaber, Zinegoak Gay-Lesbi-Trans Zinema eta Arte Eszenikoen Nazioarteko Jaialdiaren XXII. edizioa ospatuko da ekainaren 22tik 29ra. Udalak jaialdiarekin elkarlanean dihardu Lesbianismoa eta Generoa Saria babestuz, lesbianismoa genero-ikuspegitik lantzen duten lanak aitortzeko.
Urtero legez, Stonewalleko istiluak gogoratu dira, 1969an gertatutakoak, LGTBIQ+ mugimenduen hasiera ekarri zutenak. Bilboko Udalak herritarrak animatu nahi ditu ekainaren 28ko egunaren harira antolatzen diren kanpainetan, mobilizazioetan eta aldarrikapen-jardueretan parte hartzera.
