Urola Garaia mankomunitateak klima aldaketaren ondorioei aurre egiteko urrats berriak eman ditu, 'Guardasola Garaia: beroari itzala, herritarrei babesa' kanpaina abiaraziz. Ekimen honen bidez, eskualdeko bizilagunen artean bero boladen arriskuei buruzko sentsibilizazioa sustatu nahi da, eta aldi berean, klima babesguneen sare bat ezagutarazi.
Ia 800 guardasol instalatuko dira eskualdeko hainbat gune publikotan, Agenda 2030 eta Urola Garaiko klima babesguneen koloreak erabiliz. Egitura hauek ez ezik, mezu argi bat ere helaraziko dute: beroaren aurrean babestea kolektiboki arduratu behar dugun kontua da, eta mankomunitatea espazio seguruagoak eta freskoagoak eskaintzeko lanean ari da.
Ekimen hau hainbat eragileren arteko elkarlanaren emaitza da. Uggasa garapen agentziak, Legazpi, Urretxu, Zumarraga eta Ezkio-Itsasoko udalek, ikastetxeek, merkatarien elkarteek eta turismo arloak elkarrekin hausnartu dute klima egokitzapenaren inguruan, bero boladei aurre egiteko estrategiak eta udalerriak prestatzeko moduak aztertuz.
Bero handiko egunetan, herritarrei beren kabuz neurriak hartzeko deia egiten zaie: eguzkipean zuzenean egotea saihestu, behar bezala hidratatu eta arreta berezia jarri pertsona zaurgarrienei, bereziki adinekoei. Aldi berean, lau udalak eta Uggasak klima babesguneen sare bat definitzen ari dira, barruko zein kanpoko espazioak erabiliz osasuna eta ongizatea babesteko.
Kanpaina honek azken bi ikasturteetan Eskolako Agenda 2030 programaren baitan egindako lana ere jasotzen du. Eskualdeko zortzi ikastetxek klima aldaketa, osasuna eta klima babesguneak landu dituzte, eta ikasleen diagnostikoak informazio eta sentsibilizazio beharra azpimarratu zuen.
Guardasolak pixkanaka agertuko dira eskualdeko lau udalerrietan, sorpresa efektua mantentzeko asmoz. Zumarragan jartzen hasi dira dagoeneko, Urretxun ekainaren 30ean, Legazpin uztailaren 2an eta Ezkio-Itsason uztailaren 20an jarriko dituzte.
Klima aldaketara egokitzea premiazko erronka da, eta beroaren aurrean itzala, babesa eta komunitatearen zaintza funtsezkoak dira.
