Izen-emate epea ostegun honetan, apirilaren 15ean, goizeko 10:00etan hasi eta maiatzaren 16an, larunbata, gaueko 23:59ak arte egongo da zabalik. Interesdunek udal webgunearen bidez (www.bilbao.eus) egin beharko dute izen-ematea, eta bertan kontsultatu ahal izango dituzte oinarriak ere.

Lehiaketan Bizkaian bizi diren taldeek edo bakarlariek parte hartu ahal izango dute, baldin eta gutxienez kide bat Lurralde Historikoan erroldatuta badago. Bilbao Metal Pop-Rock lehiaketak genero aniztasunari eutsiko dio, Metal, Pop, Rock, Folk, Rap eta Hip Hop estiloak barne hartuz, Jazz-a izan ezik. Aniztasuna sustatzeko asmoz, epaimahaiak bereziki baloratuko ditu emakumezko kideak dituzten taldeak eta euskarazko abestiak aurkezten dituztenak.

Parte hartzeko, online formulario bat bete beharko da eta lau abesti original (mp3 edo wav formatuan), taldearen edo artistaren argazki bat eta musika-historial bat (doc, docx edo pdf formatuan) erantsi beharko dira. Guztira 15 talde hautatuko dira.

Hautatutako taldeek zuzenean joko dute Bilborock Aretoan Bilboko Aste Nagusian. Kontzertu bakoitzak 45 minutu ko iraupena izango du (gehienez 50), eta emanaldi bakoitzeko gehienez bi bertsio edo moldaketa onartuko dira. Kazetariek eta musika espezialistek osatutako epaimahai profesional batek hautatuko ditu 15 proposamenak, Villasound 2026 lehiaketako Aste Nagusia sariaren irabazlearekin batera. Kontzertuak egunero bi txandatan izango dira: 20:00etan eta 21:00etan.