Aurtengo Artearen Ibilbidea BBK, Animalario izeneko erakusketarekin, Bizkaiko 30 herritan zehar ibiliko da. Proposamen honek Bilboko Arte Ederren Museoaren bildumako 38 obraren erreprodukzioak biltzen ditu, non animaliak diren protagonista nagusiak. Erakusketa honek, José Luis Merino Gorospe museoko Arte Zaharreko kontserbatzaileak komisariatua, garai, teknika eta lengoaia artistiko desberdinetan zeharreko ibilbidea eskaintzen du, artean animalien irudikapenen balio sinboliko eta narratiboari buruz hausnartzeko.

Edizio berri honen aurkezpenean, Andoni Iturbe Eusko Jaurlaritzako Kultura eta Hizkuntza Politika sailburuordeak eta Nora Sarasola BBK Gizarte Ekintzako zuzendariak parte hartu dute, baita Miguel Zugaza Bilboko Arte Ederren Museoko zuzendariak ere. Erakusketak hainbat artistaren lanak biltzen ditu, hala nola Paul de Vos, Jacob Jordaens, Ignacio Zuloaga, Aurelio Arteta, José Arrue, Francis Bacon, Joseph Beuys, Guerrilla Girls eta Alberto Schommer, besteak beste. Horrela, animalien irudiak historian zehar balio sozial, kultural eta gizatiarren sinbolo, metafora eta isla gisa nola erabili den erakusten da.

2020an martxan jarri zenetik, BBK Artearen Ibilbidea k museoko ondare artistikoa espazio publikora hurbiltzen du, instalazio ibiltari baten bidez. Honekin batera, euskaraz, gaztelaniaz eta ingelesezko material dibulgatzaileak, bisita gidatuak eta kultur bitartekaritza jarduerak eskaintzen dira. 2026ko edizioa maiatzaren 11n Bilbon hasi eta abenduaren 9an Durangon amaituko da, Barakaldo, Santurtzi, Getxo, Gernika-Lumo, Basauri edo Mungia bezalako udalerriak zeharkatu ondoren.