Basauriko Udalak ofizial egin ditu senior mailako emakumezkoen futbol taldeko hogei jokalariak. Ardunduaga kiroldegian egindako ekitaldian eman zen ezagutzera herria ordezkatuko duten jokalarien izena. Ekitaldian izan ziren Asier Iragorri alkatea eta Jon Zugazagoitia Kirol zinegotzia, eta jokalarien babesa adierazi zieten datozen erronkarako.
Taldeak Piru Gainza txapelketan parte hartuko du, maiatzaren 30ean eta 31n jokatuko dena Soloarte zelaian. Bertan, eskualdeko beste talde batzuk ere izango dira, hala nola Ugao.
“"Badakit askorentzat txapelketa berezia izango dela Mirenengatik"
Alkateak, Miren Hernández-i egin zion erreferentzia, herriko emakumezkoen futbolaren aitzindarietako bat izan zenari, Basauritar-eko presidentea izandakoari eta joan den otsailean zendutakoari. "Basauriren kamiseta eramatea ohore bat izan behar da", azpimarratu zuen alkateak. Bestalde, Zugazagoitiak "proiektu honekin jarraipena lortzea" "arrakasta" dela adierazi zuen, "lau urte" betetzen dituen proiektu hau.
Hogeita hamar futbolarietatik hamazazpi udalerriko klubetan ari dira jokatzen: sei Indartsu-n eta hamaika Basauriko Kimuak-en. Gainerako hiruak, berriz, Arratia, Eibar eta Bilbao Artizarra-n aritzen dira.
