Aurtengo San Andres Jaiak azaroaren 20tik 30era ospatuko dira Ormaiztegi n. Jaietako egitaraua, lehen aldiz, euskaraz, gazteleraz, errumanieraz eta arabieraz argitaratu da. Ekitaldi nagusiei hasiera emateko, herriko merkatari eta tabernariak izango dira pregoilariak.
Elegante egunean, goizean, erraldoien konpartsa izango da, Pasaiako dultzaineroek lagunduta. Jaiak herria apaintzeko tailerrak ere antolatu dira azaroaren 19an, 16:00etatik 18:00etara plazan, jai batzordea, guraso elkartea, Zumalakarregi museoa eta udala elkarlanean.
Jubilatuen Jolasak belaunaldiarteko bihurtu dira eta Ormaiztegiko Harrikalariak Gazte Asanblada elkarteak (OGA) kontzertu egitarau berezia antolatu du. Mozorrotuen bazkariko eta danborradako partaideen afariko tiketak salgai daude Ormaiztegi APP-an azaroaren 22ra arte eta azaroaren 23tik 25era, hurrenez hurren.
Bestalde, Iris Muñoz Magallanesek irabazi du egitarauko azala egiteko helduen modalitateko lehiaketa, 300 euroko sariarekin. Haurren artean, berriz, Maren Abasolok irabazi du bigarren azalaren lehiaketa, 50 euroko jostailu sariarekin.




