Eskaerak aurkezteko epea abenduaren 4an amaituko da. Laguntzek kostuaren %50 estaliko dute, gehienezko zenbateko hauekin: 300 euro errotuluetarako, 120 euro irudi korporatiboa egokitzeko, eta 150 eta 500 euro artean webguneetarako, aukera linguistikoaren arabera.
Dirulaguntzak 2025eko abenduaren 1etik 2026ko azaroaren 30era bitartean egindako lanetarako eskatu ahal izango dira. Udalak tokiko jarduera ekonomikoan euskararen presentzia eta erabilera sustatu nahi ditu, merkataritzak, ostalaritzak eta enpresek herritarren eguneroko bizitzan duten garrantzia kontuan hartuta.
Horregatik, Ordiziako Udalak deialdi honetara jotzera animatu ditu udalerriko establezimendu eta enpresak. Euskararen presentzia funtsezkoa da normalizazio linguistikoan aurrera egiteko eta gero eta euskaldunagoa den Ordizia bat eraikitzeko.
Deialdiari buruzko informazio guztia eta eskaerak aurkezteko modua Ordiziako Udalaren webgunean (www.ordizia.eus) dago eskuragarri, dirulaguntzen atalean. Zalantzak argitzeko, interesdunek Udaleko Euskara Zerbitzuarekin harremanetan jar daitezke.
