Urretxu-Zumarraga ikastola ko eta Azpeitiko Izarraizpe ikastola publikoko ikasleek egindako komunikazio proiektuek irabazi dituzte BERRIA Ikasgela sariak. Guztira, hamabost ikastetxe eta 50 ikasgela aurkeztu ziren lehiaketara. Sariak Martin Ugalde kultur parkea n banatu ziren atzo.

Begoña Pedrosa Eusko Jaurlaritzako Hezkuntza sailburua eta Amagoia Mujika BERRIA egunkariko zuzendaria bertan izan ziren, Izarraizpeko DBHko 4C eta Urretxu-Zumarragako DBHko 1B ikasgeletako gaztetxoekin. Ikasleek elkarrizketa kolektibo bat egin zieten, eta rap kantari batek giroa alaitu zuen ekitaldian.

Urretxu-Zumarraga ikastolako DBHko 1B gelako ikasleen proiektua diziplinartekoa izan da, Euskara eta Gizartea ikasgaien arteko zubia eraikiz. Ikasleek gertakari historiko bat hartu eta hori gertatu izan ez balitz zer gertatuko zen aztertu dute, ipuinak eta komikiak sortuz.

Ekhi Oiartzabal, Maialen Elorza, Maider Aranzadi eta Danel Araiztegi ikasleek azaldu dutenez, proiektuan sakondu ondoren, Euskara ikasgaian jasotako testu antolatzaileak erabili dituzte idazteko.