Goizean goiz, Elosiaga auzoko gaztandegitik abiatu ziren artzainak, ardiak jetzi ondoren. Potsumentara joan ziren, bezperan hango larre batera eramandako artaldea zain baitzuten, Aralarko larreetan bazkatzeko bide luzea hasteko prest. Mando batek eta artzain batek gidatu zuten taldea, atzetik ardiak eta beste artzain bat, txakur baten laguntzarekin, artaldea kontrolatzen.

Transhumantzia antzinako ohitura da, eta artzainek ardiak bazkaleku batetik bestera oinez eramateko tradizioa bizirik mantentzea erabaki dute. Horrela, asteartean 300 ardi eraman zituzten Azpeititik Abaltzisketara, bidean mendiak eta errepideak gurutzatuz. Ardi bixienek lepotik dunbak zeramatzaten, eta Urraki gainera igo ziren mendiz. Goiatz, Bidania eta Santa Marina arteko bidea errepidez egin zuten, eta Santutxotik Legorretara jaitsi ziren.

Handik Baliarraingo urtegira igo ziren, eta bertan bazkaltzeko atsedenaldia egin ondoren, Abaltzisketara iristeko azken kilometroak egin zituzten. Gipuzkoako herri txiki horretan duten baserriko larreetan igaro zituen artaldeak ostirala arteko egunak. Ondoren, Txindokiren magaleko lurretara igo zituzten, urtero maiatzaren 1ean egiten den Aralarko larreen irekiera aprobetxatuz.

Oraingoan ardi antzuekin egin dute bide luzea. Ekainaren erdialdean, berriz, ardi esnedunak eramango dituzte Aralarrera, kamioiez. Orduan hasiko du familiak udako egonaldia, Beltzulegiko bordan, Idiazabal jatorri izendapeneko gazta egiteko.