Joan den martxoan hasitako lanak azken txanpan daude. Azken fase honetan, Azpeitiko Udalak Kaleaundiko bide zorua eta azpiegiturak berritzea aurreikusi zuen, baita Altuna Errota kalean zorua berritzea eta espaloi berria egitea ere. Orain, lan guztiak osatzear dituzte.
Joan den astean Kaleaundi zein Altuna Errota asfaltatu ondoren, atzo berritutako zoruak margotu eta kaleak ireki zituzten berriz trafikoarentzat. Lanak hasi zirenetik, Kaleaundi erabat itxita egon da ibilgailuentzat, eta horrek eragina izan du zubian dauden lineako autobusen eta eskola garraiokoen ohiko geralekuetan.
Azken hiru hilabeteetan autobusak Kalebarreneko aparkalekuan gelditu ondoren, gaurtik aurrera ohiko geraleku horietara itzuliko dira. Orain, Altuna Errotako espaloi berria bukatzea falta da, berrurbanizatze lanak osatzeko.
