Aurten izena emandako parte hartzaile kopurua nabarmen handitu da, iazko 187tik aurten izena eman duten 309ra igaroz. Epea amaitu baino bost egun lehenago plaza guztiak bete ziren, eta talde kopurua ere 16tik 25era igo da.

Edizio berri honek berrikuntza garrantzitsu bat dakar: emakumeek euren txapelketa propioa izango dute. Iazko konpentsazio neurriak ez zirela nahikoak ikusita, aurten neskentzako liga esklusiboa sortu da, eta mutilen torneoan talde mistoak onartuko dira, dagozkien konpentsazioekin. Helburua da uztailaren 1ean Zumarragako plazan jokatuko den finalean emakumeek iaz baino protagonismo eta ikusgarritasun handiagoa izatea.

Beste berritasun nagusietako bat finaleko probetan egongo da, aurten Iota enpresa arduratuko baita horiek zehaztu eta antolatzeaz. Olinpiada auzolanean antolatu da, Beloki Kirol Elkartearen, Goierri Kirol Elkartearen saskibaloi, boleibol eta areto futbol sailen, Adrian Ausinen (igeriketa) eta Argixao Atleten Klubaren laguntzarekin.

Txapelketa herrikoi hau taldeka lehiatuko da. Aurten 25 kuadrilla animatu dira esperientzia honetara: 20 gizonezkoen txapelketan eta bost emakumezkoenean. Talde garaileek 1.000 euroko saria jasoko dute Zumarragako dendetan gastatzeko, eta beste hainbat sari ere banatuko dira babesleen laguntzari esker. Talde bakoitzak babesle baten izena eramango du.

Lehen fasea maiatzaren 30etik ekainaren 21ra bitartean jokatuko da, larunbat eta igandetan, bost kiroletan: areto futbola, frontenisa, saskibaloia, boleibola eta igeriketa. Finalerdiak ekainaren 27an izango dira, eta sei talde onenek (hiru neskenak eta hiru mutilenak), atletismo probetan sailkatuta, uztailaren 1ean jokatuko den finalean parte hartuko dute.