Lazkaon, adin guztietako herritarrei zuzendutako Pausoka egitasmoaren hamargarren edizioa ospatzen ari dira. Udalak antolatutako ekimen honek, ariketa fisikoa eta elkarbizitza uztartzen ditu, eta herritarren artean harrera ona izan du, herrian errotutako ekintza bihurtzeraino.
Ibilaldiak astearte eta ostegunetan izaten dira, 10:30ean, Lazkaoko plazatik abiatuta. Jarduera honek bizimodu aktibo eta osasungarria sustatzea du helburu, giro atsegin eta irisgarrian. Oinez ibiltzeaz gain, solasean aritzeko eta une atseginak elkarrekin igarotzeko aukera eskaintzen du.
Hilabete bakoitzeko azken asteartean, Lazkaoko Ikastolako ikasleak eta Txindoki zentroko erabiltzaileak elkartzen dira belaunaldien arteko ibilaldia egiteko. Pausokaren unerik berezienetako bat da hitzordu hori, belaunaldi desberdinen arteko esperientzia trukea eta elkarbizitza sustatzen baititu.
Hamargarren edizio honekin, Pausokak ongizatea eta pertsonen arteko harremanak uztartzeko duen gaitasuna berretsi du. Ariketa fisikoa egiteaz harago, elkarrekin denbora pasatzearen eta harremanak sortzearen balioa nabarmentzen du egitasmoak, jarduera erraz eta irisgarri baten bidez.
Lazkaoko Udalak herritarrei dei egin die ibilaldietan parte hartu eta jarduera fisikoa sustatzeaz gain, harreman sozialak sendotzen dituen egitasmo honetaz gozatzen jarrai dezaten.
