Eskola publikoak Elkartasun Astea ospatzen ari da egunotan, eta horren amaiera gisa, bi urtean behin egiten den Azoka Solidarioa egingo dute. Azoka honetan, Olamendiko familiek prestatutako gozoak salduko dira, baita Euskal Herritik kanpoko beste herrialde batzuetakoak ere. Erosleen artean sasoiko produktuez betetako saski bat zozkatuko da.
Azokan bildutako dirua Paz con Dignidad elkarteari emango zaio, eta honek, aldi berean, Al Awda elkarteari bideratuko dio laguntza. Olamendi ikastetxeak aurretik ere erakutsi du Palestinaren aldeko jarrera, ikasturte hasieran herrialde horren aldeko elkarretaratze bat eginez, Gure Haurrak ere Badira ekimenaren deialdiari erantzunez.
Diru bilketaz gain, Auzoak Bizirik, Hotz Legazpi, Lekanazpi, Buskabaso eta Beti Gazte elkarteek haurrentzako arropa bilketa ere egingo dute elkarlanean. Jasotako arropekin loteak egin eta eskatzen dutenen artean banatuko dira. Buskabaso auzo elkarteak ludoteka bat ere sortu du San Ignazioko lokalean, eta bertan herritarrek emandako jostailuak eta liburuak jasotzen ari dira.
“"Gure lan ildoetako bat integrazioa da, eta dakigunez, gure auzoetan behar asko dago, gero eta gehiago, ez da kanpora joan beharrik."
Azokaren eta Buskabasoren ekintzen helburuetako bat integrazioa da. Elkarteko presidente batek adierazi duenez, integrazioa da beraien lan ildo nagusietako bat, eta auzoetan gero eta behar handiagoa dagoela nabarmendu du. Legazpin arlo honetan lan egiten duten elkarte gehiago daude, eta elkarlanean aritzeko proposamena egin zen, Olamendiko zuzendaritzak ongi hartu zuena.
Elkartasun azoka hau Olamendik ospatu berri duen Zientziaren Astearen ondoren dator. Santikutz jaien aurreko egunak zientziari eskaini zitzaizkion Lehen Hezkuntzako ziklo guztietan, eta ikasleek hainbat jardueraz gozatzeko aukera izan zuten, gehienak eskolako laborategian burutu zirenak. Gurutze Gorriko anbulantzia baten bisita ere izan zuten, ikasleek barrutik ezagutzeko aukera izan zutelarik.
